Un ringraziamento particolare all'attore Salvo Piparo, autore di questa lettera......

“LITTRA” DELLA SANTUZZA AI PALERMITANI!

Studio Legale Sinibaldi
Grotta di MontePellegrino n. 1624
Cap scancellato


All’Abbondante, Giunonica, Felicissima, Giusta e Timorata
Gloriosa Palermo

In qualità di tua Avvocata ti scrivo questa littra, pi fariti sapiri, ca pu iornu ru Fistinu si convocata a me casa picchi’ ama a parrari r’una mala comparsata a tuo carico e pell’occasione ca sacciu ca viani …sempre picchi’ ti vogghiu biani e ti piansu
stau priparannu i soliti babbaluci a sucari
ca un ponnu mai mancari,
ca sacciu ca tu ci tiani quantu è biaru ca stimi a pasta o furnu.

Ora livannu a Gesu’ e a Maria a casa
tenuto conto degli urtimi busillibus e teatrini accaduti in città
sto preparandomi anche un discorso da leggere in tua difesa pell’intera cittadinanza “tutta” ca ni veni ad appraudire comu ogni annu,
giusto un baglio, una luce …pi mittirinni u fiarru r’arriari a puarta
e viremu si d’accussi putiamu livari i lastimi …e ma diri sempri grazie.

Certu è però …ca si comu voli u signuri
un ti ni scannaliasti pruapriu ri l’urtima vuata…

certu è ca fu chiu’ facili scattiari la pesti tannu …no milleseicento e bintiquattru, ca no uara cu tutti sti liggi ca ni vennu cuantru…
certu puru tu… aiutati ca diu t’aiuta, si misa mali…
ne tia cu si susi a matina pigghia e voli cumannari
e poi a comu è misa st’annu a varca, ma cririri com’una suaru granni:
chiu’ scuru i menzanotti un po’ fari !

A matula io mi spirniciu p’accurdari i viulini e i chitarri nei tuoi riguardi,
un ci potti nianti…
U Diu-Patri fu chiaru, appena senti parrari ri tia
si metti i manu e capiddi e ci veni i lanzari …e pigghia Aulin !
…a ura ca si parra ri tia e di comu t’ama a fari scapuliari a cunnanna
ritta un ci trasi, torta un ci piaci e semu sempri puntu e a capu,
tantu ca appi u curaggiu i ririmi ca io me livari i suttascupa
…ca i to guai ti la chianciri tu e tutta a to razza ri palermitani cruzzuna
e ha aggiunto puru ca zimmittara, immuruta e piritualla ci ha statu siampri ma ngrasciata comu uara, Mai !!!
ora cuè chiu’ luaccu ?
Carnalivari o cu ci va r’appressu.

Io u sai chi ti ricu,
ora mi staiu preparannu i valigi e minni vaiu in ferie
…luntanu …u chiu’ luntanu ri cà …voli Diu
ca megghiri a sbariari e me scurdari tutti i pinsiari
e puru sta puzza ca mi trasi finu na rutta e mi fa beniri i stinnicchi
…unna supportu chiu’, viu i stiddi i menziuarnu, Basta !
…stannu appresso a tia io ci appizzu puru i picciuli ra causa
e si i cosi un s’aggiustanu, all’annu chi biani
i babbaluci ti portu a culloquiu… Occiarduni !!!

Baci Bacietti e Bacinelle

la tua Avvocata
(…continuando così delle cause perse)
Rosalia Sinibaldi